Mark 15

Yesuta꞉ Pailedi pa꞉ta꞉ hatuku pemekeeki

(Ma꞉tiu 27꞉1-2,11-14, Luku 23꞉1-5, Dioni 18꞉28-38)

1Da ka꞉la꞉paaso siki yeni peao haemeke you haliwekima꞉ make tondiki haliwekima꞉ make wape pea wala꞉tiki pu haemeke haliwekima꞉ make ka̱le̱sete haliweki paeyaoma꞉ make pi hotimikime. Kutupa mo haliwekima꞉ Yesu tonkao mea Pailedi pa꞉ta꞉ hatuku pemekeme. 2Pailedima꞉ Yesu pa꞉ta꞉ lota꞉ pitolo alota꞉ Neketa꞉ Diu wanda꞉halina꞉ kini hali halepe leekeme. Yesuma꞉ Pailedina꞉ pi hombo peaaso alota꞉ Koto aleme leekeme. 3Kutupa mo yeni peao haemeke you haliwekima꞉ kiki ma̱leke litolo Yesuna꞉ pieke ekimanu pa la꞉ mea tiaemekeme. 4Pailedima꞉ Yesu paa lota꞉ pitolo alota꞉ Pi ma꞉nda꞉ na lelipikipe. Naka꞉ hau pu hala꞉ ekimanu wopu pa꞉ta꞉ neke do la꞉ mea tiaaseme handa꞉e leekeme. 5Koto leekepate Yesuma꞉ pi ma꞉nda꞉ na leekeme. Koto ekina꞉ Pailedima꞉ penkili piekeme.

Pailedima꞉ Yesu lina꞉ leekeeki

(Ma꞉tiu 27꞉15-26, Luku 23꞉13-25, Dioni 18꞉39—19꞉16)

6Lombei Pupa Yapeeke natena꞉ ne pambao haemeke pita꞉ wanda꞉halina꞉ honke la꞉tiki pu haemeke tupa꞉ dipula pitieke hali homeke honke lemeketa꞉ da pena꞉ Pailedima꞉ tapatiki pu hayekeme. 7Koto dina꞉ta꞉ haliweki mandane ekimanu dipula da pa꞉ta꞉ pitimikime. Koto haliwekima꞉ kapomani pa꞉ta꞉ a꞉nda꞉ limiki pita꞉ wanda꞉hali limikime. Kutupa iki ame̱le̱ hali homeke ipika꞉ bikita꞉ Batabasi pitiekeme. 8Wanda꞉hali paeyao wopuma꞉ momba꞉la hata꞉ Pailedi pa꞉ta꞉ a꞉pa honke alo hata꞉ alota꞉ Niki pa꞉ta꞉ peao hale tupa꞉ peae lemekeme. 9Pailedima꞉ iki pa꞉ta꞉ alota꞉ Ika꞉ honema꞉ta꞉ mo hande Diu wanda꞉halina꞉ Kini hali tapawanope leekeme. 10Ipika꞉ honema꞉ta꞉ yeni peao haemeke you haliwekima꞉ Yesu pa꞉ta꞉ honditi pitolo hata꞉ ipiki pa꞉ta꞉ mea hatuku epena꞉ lemeke ekita꞉ Pailedima꞉ hone wieke handaa leekeme.

11Koto leekepate mo yeni peao haemeke you haliwekima꞉ta꞉ wanda꞉halima꞉ Yesu na tapake Batabasi tapawaena꞉ honke lape laa ti lemekeme. 12Kutupa Pailedima꞉ iki pa꞉ta꞉ alota꞉ Diu wanda꞉halina꞉ Kini halie aleme halita꞉ eki peaanope leekeme. 13Haliweki paeyaoma꞉ pa pi tanda pu alualu pitolo alota꞉ A꞉ka꞉tei wape piki tina꞉ homena꞉e lemekeme. 14Pailedima꞉ iki pa꞉ta꞉ alota꞉ Ekipekepe. Eki hau pa꞉la꞉pe leekepate pi pa daeyao tanda pitolo hata꞉ alota꞉ A꞉ka꞉tei wape piki tina꞉ homena꞉e lemekeme. 15Koto ekina꞉ Pailedima꞉ mo wanda꞉hali paeyaona꞉ hone pa꞉la꞉eki puluekema꞉ Batabasi da tapawaeyekeme. Kutupa Yesuta꞉ yombua baena꞉ laata꞉ haliwekima꞉ a꞉ka꞉tei wapepiki tina꞉ tamendiao homaena꞉yeke haliweki pa꞉ta꞉ Yesu mea haleekeme.

Yesu ki ki taemekeeki

(Ma꞉tiu 27꞉27-31, Dioni 19꞉2-3)

16Dolo a꞉ndeli miniki haemeke haliwekima꞉ta꞉ mo Kapomani tiekena꞉ da hama tukiki pa꞉ta꞉ Yesu hatuku pemekeme. Koto da bikita꞉ Pa꞉totiomo dae. Kutupa mandane dolo a꞉ndeli miniki haemeke haliweki paeyao epena꞉ wi lemekeme. 17Haliwekima꞉ wepiki nono piki dau ma꞉nda꞉ meaata꞉ Yesuna꞉ lokena꞉ pambaemekeme. Kutupa tekeke hake alemanu meaata꞉ hopa꞉ hopa꞉ liao ipika꞉ youna꞉ pambaemekeme. 18Kutupa kikima꞉ salusi pitolo hata꞉ alota꞉ Diu wanda꞉halina꞉ Kini halio. Hao hapekee lemekeme. 19Kutupa doloma꞉ ipika꞉ you yumba꞉tiki pea ipiki pa꞉ta꞉ dopi taatiki peaata꞉ tumiki yotu hatiki pea ipiki pa꞉ta꞉ yayapiki hau pitolo hata꞉ panda꞉ puniatiki pimikime. 20Yesu makeao moneaota꞉ mo hande dau wepikieki hola꞉ meata꞉ ipika꞉ ota꞉ daumanu yamaemekeme. Kutupa a꞉ka꞉tei wapepiki tina꞉ tamendiao homaaluekema꞉ Yesu hama hatuku pemekeme.

Yesuta꞉ a꞉ka꞉tei wapepiki tina꞉ tamendiao limikieki

(Ma꞉tiu 27꞉32-44, Luku 23꞉26-43, Dioni 19꞉17-27)

21Pota꞉na꞉ puaata꞉ hali ma꞉nda꞉ manda꞉hande pimikime. Mo halita꞉ Saitini da hali Saimonoe. Ipikita꞉ A꞉lekesa꞉nda Lupasi yaapo ipilika꞉ ateke hayekeme. Dolo a꞉ndeli miniki haemeke haliwekima꞉ mo hali meaata꞉ Yesuna꞉ a꞉ka꞉tei wape piki ti mea tiawaena꞉ lemekeme.

22Kutupa ikana꞉ma꞉ Yesuta꞉ mo Kolokoda alena꞉ hatuku pemekeme. Hali you holikima꞉ handeke alena꞉e. Koto ekina꞉ Kolokoda lemekeme. 23Koto alena꞉ waini ikalita꞉ mo mulamula ale ma꞉nda꞉ taapuna꞉ apa꞉tao Yesu pa꞉ta꞉ halemekepate ipikana꞉ma꞉ kiao na neekeme. 24Kutupa ikana꞉ma꞉ mo a꞉ka꞉tei wapepiki tina꞉ Yesu tamendiaota꞉ ipika꞉ daumanu telipuluekema꞉ haliwekima꞉ kase tupa꞉ peaata꞉ tombo wataeyeke halima꞉ ipika꞉ hone pa꞉la꞉ dau mia꞉tiki pimikime.

25Nate wenokona꞉ haena꞉ Yesu mo a꞉ka꞉tei wapepiki tina꞉ tamendiaemekeme. 26Kutupa mo a꞉ka꞉tei wapepiki tina꞉ pi dupa wape piekeme. Diu wanda꞉halina꞉ Kini halie wape piekeme. 27Pake nepeke hali yaapo make Yesu ame̱le̱ a꞉ka꞉tei wapepiki tina꞉ tamendiaemekeme. Ma꞉nda꞉ta꞉ Yesuna꞉ popeke nane kikina꞉ ma꞉nda꞉ta꞉ ipika꞉ hoe nane kikina꞉ tamendiaemekeme. 28[Kutu pimiki ekita꞉ mo Baibolo buka pa꞉ta꞉ wape pa꞉la꞉ pita꞉ ota꞉ yaeyekeme dupae. Mo pi wieke ekimanu yambelemeke haliweki ame̱le̱ hala꞉ halie hone wimikime wape pa꞉la꞉me.]

29Pota꞉na꞉ lombei pupa pa pu yapemeke wanda꞉halima꞉ Yesu ki ta ta pu amboke wankeatiki pitolo alota꞉ Aha. Neketa꞉ mo hande tembolo da I̱ma꞉ hoeyao hoto tepona꞉ paa a꞉elueke le hande halipe. 30Naka꞉ kone da꞉ta mo a꞉ka꞉tei wapepiki tina꞉ hola꞉pa꞉niao epoe lemekeme. 31Kutupa mo yeni peao haemeke you haliwekima꞉ make mo wape pea wala꞉tiki pu haemeke haliweki ame̱le̱ ika꞉ ika꞉ kone Yesu kitaaso hata꞉ hande lemeke tupa꞉ alota꞉ Mandane wanda꞉hali da꞉tatiki piekepate ipikana꞉ma꞉ ipika꞉ kone da꞉taapeke na ya꞉la꞉me laata꞉ ipiki pa꞉ta꞉ alota꞉ 32Neketa꞉ Isulai wanda꞉halina꞉ Kini hali hande Ketiso haekena꞉ta꞉ ota꞉ koto a꞉ka꞉tei wapepiki tina꞉ neke holepeleeki nikana꞉ma꞉ handoma꞉ka꞉na꞉ta꞉ naka꞉ pi ota꞉ opulumeke lemekeme.

Yesu homeekeeki

(Ma꞉tiu 27꞉45-56, Luku 23꞉44-49, Dioni 19꞉28-30)

33Nate you tikekena꞉ haena꞉ mo kenke paeyao timba꞉ la꞉ pamba puaata꞉ nate 3 okoloko (lekelo yopula꞉ dina꞉ta꞉) paa pa̱a̱ piekeme. 34Nate 3 okoloko (lekelo yopula꞉ haena꞉) Yesuma꞉ anekehapu wi la alota꞉ Eloi. Eloi. Lama sa꞉ba꞉kadani la alota꞉ doeki leekeme. Ya Koda꞉o. Ya Koda꞉o. I̱ ekipeke yonka꞉laalepe leekeme.

35Ipiki teke pa꞉ta꞉ haemeke wanda꞉hali mandaneeki manuma꞉ opua alota꞉ Opua꞉pe. Elaidia wi ala꞉me lemekeme. 36Kutupa hali ma꞉nda꞉ma꞉ anke hao pua wa꞉la꞉mbima꞉ handeke ale ma꞉nda꞉ meaata꞉ kake liki neke waini ikali tenke lao tumba pitina꞉ laa tumapuna꞉ hapulao Yesuma꞉ dodopo lena꞉ hala꞉liaaso alota꞉ Hando hape. Elaidiama꞉ ipiki a꞉pa honda꞉ miliepe. Handomana꞉e leekeme. 37Kutupa Yesuma꞉ anekehapu wi laa ota꞉ homeekeme.

38Yesu homeeke ekima꞉ta꞉ mo tembolo da tukiki pa꞉ta꞉ hande tupele pieke dauta꞉ oli holu nanema꞉ sinki peaalupuniaota꞉ ta꞉ta꞉ ualu piekeme. 39Kutupata꞉ a꞉ndeli miniki haemeke haliwekina꞉ opisa halima꞉ Yesuna꞉ leke popeleke nane hayekeme. Kutupa Yesuna꞉ homeekeeki handolo alota꞉ Woo. Do halita꞉ ota꞉ Koda꞉na꞉ Eiyeke ya꞉ka꞉ta꞉me leekeme.

40Mandane wanda꞉wekima꞉ hosiki yola꞉ta꞉ pao hata꞉ handeteke haemekeme. Koto wanda꞉weki ame̱le̱ Ma꞉kadala da wanda꞉ Meti hayeketa꞉ kutupa mo wetepe weki Dia꞉mesi Diosepe hama̱la̱꞉na꞉ inkiki Meti make Salome make haemekeme. 41Yesuta꞉ Ka꞉lili nane hayeke pita꞉ koto wanda꞉wekima꞉ ipika꞉ hoki nane teli mea pomu hata꞉ ipika꞉ ne yankatiki pu haemekeme. Mandane wanda꞉weki wopu make ipiki ame̱le̱ Diutuseleme da a꞉paata꞉ koto alena꞉ haemekeme.

Yesu toko mea hoimikieki

(Ma꞉tiu 27꞉57-61, Luku 23꞉50-56, Dioni 19꞉38-42)

42Kutupa nate honda꞉ pambuluekema꞉ semoko da wape pitolo haena꞉ Diu wanda꞉halina꞉ Hoto Pila꞉ Natena꞉ pituluekema꞉ tiki tiki yao wamo pita꞉la꞉ dina꞉ yeeke handaa 43A꞉ta꞉matia da hali Diosepe epeekeme. Ipikita꞉ epeke ka̱le̱sete hali hayeketa꞉ ipikana꞉ma꞉ make Koda꞉na꞉ Kilu Tombuao Hala꞉eki epena꞉yeke handeteke hayekeme. Ipikana꞉ma꞉ honkopu hao puaata꞉ Pailedi pa꞉ta꞉ Yesuna꞉ toko honda꞉ meonoe laa honke leekeme. 44Kutupa Pailedima꞉ Yesu amba꞉ homea꞉ka꞉ta꞉me pi opuaata꞉ penkilipa꞉tia pomua mo hande a꞉ndeli dolo miniki haemeke haliwekina꞉ opisa hali epena꞉ wi la꞉ mea lota꞉ pitolo alota꞉ Yesu amba꞉ homa꞉la꞉pe leekeme. 45Homea꞉me leekeeki opuaata꞉ Diosepema꞉ Yesuna꞉ toko mina꞉ leekeme. 46Diosepema꞉ epeke hakepiki dau seliapo hambaata꞉ Yesuna꞉ toko honda꞉ mea hande dau te̱liao tonka mea tiaa puaata꞉ toopi ka꞉ka꞉na꞉ pa꞉ta꞉ lapa꞉ piekeme. Toopi homeke ma꞉nda꞉ mea petepete peatiki pua mo toopi ka꞉ka꞉na꞉ a꞉mbeekeme. 47Ma꞉kadala da wanda꞉ Metima꞉ make Diosepena꞉ inkiki Metima꞉ make Yesu ipika꞉ lapa꞉ piekeeki handepekeme.